Cenomannica
Hanc imaginem photographicam feci in regione nomine Arcadia in Cenomannica: nomen latinum lectoribus forte ignotum. Lingua anglica dicitur “Maine”. Cenomannica (Maine) est una e Federatis Civitatibus Americae Septentrionalis.
Hic, nonnullos dies mihi licuit commorari, animum recreare, corpus refocillare. Verba Sancti Hieronymi venerunt in mentem: Habeat sibi Roma (Miamia in casu meo) suos tumultus, arena saeviat, circus insaniat, theatra luxurient. Mihi adhaerere Domino bonum est, et ponere in Domino Deo spem meam: ut cum paupertatem istam caelorum regna mutaverint, erumpam in vocem: "quid volui super terram?" Scilicet, cum tanta reperiam in caelo, parva et caduca quaesisse doleam in terra.
Animi solatium est, experiri naturalem pulchritudinem: arborum umbras, aeris temperiem, strata sub pedibus folia, vespertinam quietem, silentium nocturnum.
No comments:
Post a Comment